O Espazo Xove de Noia xa conta co primeiro hotel de bichos da vila

Un grupo de mozos e mozas do Espazo Xove de Noia e do colectivo Noia Limpa participaron na construción do primeiro hotel de bichos da vila, que quedou instalado de forma permanente nos xardíns do centro.

A estrutura realizouse coa colaboración do Concello, e foi visitada polo alcalde, Santiago Freire, e Ana García, concelleira de Emerxencias e Parques e Xardíns.

Fíxose con materiais naturais e servirá como refuxio para insectos beneficiosos, como abellas solitarias, xoaniñas ou bolboretas. Estes pequenos habitantes son fundamentais para o equilibrio do ecosistema, xa que axudan na polinización e no control de pragas.

«Trátase dn refuxio para a biodiversidade e tamén dun espazo de educación ambiental», sinalan dende Noia Limpa.

Algúns participantes nesta iniciativa aproveitaron para facer instalacións similares, pero máis pequenas, que colocaron nos xardíns das súas casas.