Víctor Pérez recibiu en Outes o premio do Certame Francisco Añón de poesía

Outes acolleu a entrega de premios do XXIX Certame Francisco Añón de poesía, no que resultou gañadora a obra Non plantaremos o millo en abril, de Víctor Pérez Estévez, de Panxón (Nigrán). O poemario achega a ao universo persoal do autor mesturando o cotiá, os coidados e a transimisión da memoria familiar, conectando xeracións e deixando, ao tempo, «un pouso doce e amargo», segundo o xurado do concurso. Opremio consistiu en 1.500 euros e a publicación da obra o vindeiro ano.

Asemade, Patricia Torrado, de Porto do Son, foi distinguida cun accésit (publicación) pola obra Grolos de ausencia e augaforte. O xurado destacou o seu alto grado de elaboración e a súa potente carga simbólica, así como o emprego da lingua culta e o afastamento das fórmulas estereotipadas.

Nas categorías infantís e de mozos, foron premiados Leo Iglesias Martín, por Totoro; Bruno Solís Servide, con A bolboreta; Mateo Puente Cao, con Mamá; Duarte Mariño Torrado, con Autolesión; Sara Alvarellos Olveira, por Pena que estivera soñando; Joel Dalmau Barcala, con Non entendo; Sophie Antonella Sepúlveda, por Se eu fose; Cristina Vicho de la Fuente, con Homero é un feixe pequeno de verzas; e Enma Serrano Caneda, con Anacos efémeros.

No acto de entrega de premios, presidido polo alcalde, Francisco Calo, presentouse o volume que recolle os poemarios galardoados en 2024, e tamén o libro de Vicente Vázquez Vidal O conto da leiteira, gañador da última edición.