Convocan un certame de arquitectura para a renovación da fachada marítima da Pobra

O Concello da Pobra, a Fundación RIA e o Colexio de Arquitectos de Galicia colaboran para impulsar un concurso de arquitectura que marcará o futuro da fachada marítima do municipio. Este proceso de planificación estratéxica, que guiará a transformación urbana do municipio, actívase grazas á sinatura de dous convenios de colaboración, un entre o Concello e a Fundación RIA e outro entre o Concello e o COAG.

A colaboración entre entidades permitirá lanzar o vindeiro mes un concurso público para a redacción do plan director da fachada marítima, momento a partir do cal se abrirá o prazo para a recepción de candidaturas. Este proceso aspira a crear un novo modelo de relación entre A Pobra e o seu bordo litoral, desde unha perspectiva centrada nas persoas, o espazo público e o territorio.

A iniciativa conta co apoio da Fundación MOP, que contribúe ao financiamento dos estudos previos de análise e planificación e dos premios do concurso.