Francisco Calo, alcalde de Outes: «Este Goberno será o do contacto diario coa veciñanza e cun alcalde ao 100%»

Francisco Calo é alcalde dende o 25 de febreiro tras unha moción de censura apoiada por un concelleiro tránsfuga do PSOE que presentou «por responsabilidade» e tras meditalo moito. Nos dous anos que lle quedan de mandato, o rexedor do PP márcase como retos aprobar o contrato do SAF e mellorar vías e infraestruturas municipais que, sostén, sofren anos de abandono.

_Estamos practicamente no ecuador do mandato municipal, pero non leva vostede nin 100 días sendo alcalde. É pronto para facer balance? 

_É certo que non pasaron nin 100 días, pero podo dicir que o balance é positivo. Están sendo semanas de moito traballo, moi intensas, configurando o Goberno e aprobando os orzamentos, as dúas premisas que nos marcamos na arrancada e xa estamos dándolle ao Goberno o carácter que queremos darlle, que é o do contacto diario coa veciñanza. A xente está acudindo masivamente ao Concello para transmitirnos as súas inquedanzas e necesidades pendentes de atender. Niso estamos, atendendo os veciños, para poder tomar medidas acordes a estas necesidades.

Víctor Pérez recibiu en Outes o premio do Certame Francisco Añón de poesía

_É dicir, que ten o despacho cheo todos os días...

_Si. Un dos cambios que houbo é que pasamos a ter un alcalde ao 100%, algo que non sucedía dende o ano pasado e que se estaba demandando. A veciñanza busca a figura do alcalde para transmitirlle os seus problemas, e xa temos moitos asuntos para resolver.

"Os veciños ían ao concello e non atopaban a quen dirixirse"

_Non estaba o seu predecesor a disposición da veciñanza?

_O anterior alcalde aprobara en setembro pasado unha dedicación do 20% e, polo tanto, a súa presenza baixara moitísimo. Practicamente viña tres mañás á semana. Os veciños ían ao Concello e non atopaban a quen dirixirse. E iso tamén deu lugar a tensións no seo do anterior Goberno.

"Presentar a moción de censura non foi unha decisión fácil, pero si meditada"

_Foi un dos detonantes da moción de censura?

_O anterior Goberno non ganara as eleccións, non contaba co apoio maioritario nas urnas; nós si. Pero foi o pleno o que nomeou o anterior alcalde e foi o pleno o que o destituíu. O PP quedou a preto de 60 votos dunha maioría absoluta e, no momento en que o concelleiro do PSOE abandonou o Goberno, o tripartito deixaba de ter apoio no pleno. Nós temos un proxecto, grupo para gobernar, eu sentíame preparado, as circunstancias déronse e, nun exercicio de responsabilidade, demos un paso á fronte. Non foi unha decisión fácil, pero si unha decisión responsable.

A Real Academia Galega fai relocer unha foto de 1890 da romaría de San Campio de Outes

_Ese concelleiro tránsfuga do PSOE está no seu Goberno como responsable de Deportes. A súa expulsión do partido non é firme aínda. Cando o sexa, vaino apartar do Executivo? 

_Ata o de agora, esa é unha cuestión entre José Antonio Caamaño e o seu partido. Chegado o momento, teremos que avaliar a situación e tomar unha decisión. De momento, traballamos no día a día.

_En todo caso, vai ter en conta o pacto antitransfuguismo que ten asinado o PP?

_Non vou anticipar ningunha decisión. Polo momento é un tema entre Caamaño e o seu partido.

"Non vou anticipar ningunha decisión sobre José Antonio Caamaño. Polo momento traballamos no día a día"

_Enténdese ben con el? 

_O Goberno está funcionando ben e de maneira fluída, como un equipo que traballa de forma conxunta. Antes, os veciños transmitían constantemente que parecía que había tres gobernos diferentes.

_En que se traducía iso na xestión cotiá?

_Non pode ser que se deixen de atender asuntos prioritarios para facer outras actividades menos necesarias. Constatámolo cando vimos que tiñamos que axustar determinadas partidas orzamentarias. Por exemplo, a do Servizo de Axuda no Fogar (SAF), que non tiña fondos suficientes para chegar a fin de ano. Hai que tomar decisións con sentido común.

La Xunta autoriza una línea de alta tensión para un eólico en Outes que atraviesa terrenos de más de 300 propietarios

_Que foi o que máis lle sorprendeu nestes tres meses de alcalde? 

_A situación económica do Concello. Sorpresa non foi, sabiamos que era bastante deficiente.

_Como a da inmensa maioría dos concellos...

_En 2019 o anterior Goberno atopou unha situación económica boa, sen débedas con entidades financeiras, cun remanente importante e unha liquidez no Concello de 4.600.000 euros. O día da moción de censura aseguraron que marchaban con todas as facturas pagadas e que deixaban un remanente de 780.000 euros. Pero ese mesmo día vimos que había 365.000 euros pendentes de pago e, entre nóminas e Seguridade Social, outros 900.000 euros para pagar. Aínda nos falta o dato do remanente de Tesourería. Ter toda a información é básico para poder facer unha planificación.

Diego Calvo anima a alcaldes e voceiros do PP do Barbanza "a poñer toda a carne no asador" na senda hacia as municipais

_En todo caso, cales van ser as prioridades para estes dous anos?

_Imos escoitar os veciños e atender as dúas demandas, empezar a traballar nos orzamentos de 2026 e sacar adiante o contrato do SAF. Tamén é prioritario o ciclo da auga e mellorar a rede de saneamento. O ano pasado apareceu unha contaminación microbiolóxica na rede de abastecemento e unha das razóns foi a falta de mantemento das instalacións. O mesmo pasa con moitas infraestruturas municipais, sobre todo nos accesos ás aldeas e aos núcleos urbanos. Moitos viais están nunha situación lamentable. Tampouco temos obras no Plan Único da Deputación, porque o anterior Goberno só meteu gastos xerais. Hai que buscar o financiamento para facer todo isto.

_Disposto a petar na porta da Xunta?

_Sempre defenderemos os intereses dos nosos veciños ante a Xunta, a Deputación da Coruña e o Goberno central, se fai falta.