Mozos e mozas realizarán nove murais sobre a cultura mariñeira nos concellos do Galp Costa Sostible

O edificio de usos múltiples do Galp Costa Sostible, en Noia, acolleu a presentación do proxecto para a creación de nove murais participativos sobre a cultura mariñeira, que se realizarán ata novembro nos territorios que integran a entidade (Fisterra, Cee, Corcubión, Dumbría, Carnota, Muros, Outes, Noia e O Son).

A iniciativa foi presentada polo presidente do Galp, Mariano Lago; a xerente, Manuela Oviedo; e representantes dos concellos.

Os obxectivos son: introducir a visión da mocidade do territorio nas actuacións a realizar polo Galp; visibilizar a cultura mariñeira a través de novas formas de expresión artistica acorde cos intereses de dito colectivo; e promover o coidado do medio ambiente e a inclusión social.

Os murais faranos adolescentes da zona baixo a coordinación da entidade Vella Escola, de Noia, especialista en cultura urbana, e encargada tamén de subministrar os materiais cos que se executarán os deseños. Cada mural levará unha placa cos seus nomes.

«Utilizaranse pinturas ecolóxicas que absorben os contaminantes ambientais. Trátase de pinturas fotocatalíticas que axudan a preservar o medioambiente ao absorber os gases do tráfico rodado», explicou Pablo Castiñeira, responsable da Vella Escola.

O primeiro mural farano en xuño 12 mozos e mozas de entre 15 e 17 anos no pavillón de Muros.