Profesionais da sanidade e das emerxencias fórmanse en Ribeira para protocolizar actuacións

Máis de 70 traballadores vinculados ás emerxencias, pertencentes aos Puntos de Atención Continuada de Ribeira, Boiro e Rianxo, bombeiros de Muros e Ribeira e efectivos do GAEM de Ribeira, participaron este sábado nunha xornada formativa co obxectivo de protocolizar e estandarizar a forma de actuación en distintas emerxencias e crear a base dun programa formativo dentro das súas instalacións.

Ribeira é o primeiro concello galego adherido á rede de voluntarios Cardi@ngel, formados en reanimación cardiopulmonar

A iniciativa xurdiu nunha xuntanza que tiveron o concelleiro de Sanidade, Juan Luis Furones, e a coordinadora do PAC de Ribeira, Mónica Buela, a consecuencia do apagamento eléctrico masivo do pasado 28 de abril.

Pensouse na creación dun equipo multidisciplinar de formadores (médicos, farmacéuticos, enfermeiros, bombeiros, etc.) para a elaboración de sesións nas que se presentarán os principais temas e inquietudes no eido das emerxencias.

Furones presidiu as xornadas xunto con Mónica Buela, que presentou e coordinou estas sesións que comezaron ás 08.30 horas e remataron ás 14.45 horas cun programa no que se abordaron os protocolos do PAC de Ribeira, o SVB e o SVA, con Antonio Villaverde (do TES de Rianxo) e Leonor Estévez (médica do 061) que tamén interveu nun relatorio sobre o

shock.

Por outra banda, Javier Cortizo, dos bombeiros de Muros, e Baltasar Valentín, do de Ribeira, falaron sobre a excarcelación e a coordinación.

Para rematar, Rosana Castelo, farmacéutica do centro de saúde de Ribeira, falou sobre os fármacos das urxencias extra hospitalarias.

Con esta iniciativa trátase tamén de dar visibilidade e poñer en valor o traballo que fan os PAC.

As xornadas retomanse despois do verán.