A casa da cultura de Porto do Son será obxecto dunha mellora integral

A Consellería de Cultura, Lingua e Xuventude financiará con 150.000 € a mellora da eficiencia enerxética da casa de cultura de Porto do Son. A actuación incluirá a mellora da accesibilidade, a reparación da cuberta e a reforma do sistema de abastecemento de auga potable.

Porto do Son planea estender a rede de auga á zona sur do concello

O investimento será repartido en dúas anualidades. Para este 2025 resérvase unha partida de 49.922 € para actuacións previas, demolicións, accións nas cubertas e xestión de residuos, principalmente.

En 2026 a achega será de 100.077 €, para intervir nas cubertas, carpintarías e revestimentos e para desenvolver tarefas de illamento e novas instalacións e equipamentos.

A casa da cultura sonense conta cun sistema de climatización consistente en chan radiante eléctrico, o que xera un importante consumo, polo que se fai necesario substituílo por sistemas de calefacción máis eficientes co obxectivo de reducilo e mellorar a eficiencia enerxética do edificio.

Así mesmo, a cuberta do inmoble presenta falta de illamento térmico e problemas de impermeabilización, unha das principais causas que afectan negativamente o consumo de enerxía. Tamén se habilitarán aseos adaptados na planta baixa do complexo e renovarase a rede de abastecemento de auga potable.