Denuncian verteduras na praia da Raposiña, na Pobra

A Plataforma en Defensa da Ría de Arousa (PDRA) remitiu á Consellería do Mar e a Augas de Galiza sendas denuncias do sector pesqueiro e marisqueiro pola detección de verteduras entre o 29 de setembro e o 3 de outubro na praia da Raposiña, da Pobra do Caramiñal.

O presidente da PDRA, Xaquín Rubido, sinalou que teñen constancia por parte do sector de que estas verteduras «realízanse pola noite e polo seu aspecto poden ser presuntamente o resultado da limpeza de instalacións de transformación de alimentos».

Asegurou que na semana do 29 de setembro ao 3 de outubro «foron visualizadas unha grande cantidade de nubes flotantes brancas» que eran máis densas nas proximidades da devandita praia e que «ían dispersándose ata a entrada do porto da Pobra».

Segundo consta na denuncia o episodio de contaminación «foi especialmente intenso» o 3 de outubro arredor das 05.00 horas.

Plan extraordinario

Diante destas verteduras, a PDRA exixiu á Consellería do Mar a posta en marcha dun Plan de actuación extraordinario de seis meses de duración. Demandan que se comprobe a presenza destas verteduras recorrentes en horario nocturno (entre 00.00 e 06:00 horas), nas saídas dos emisarios das verteduras das fábricas e nas súas proximidades. Tamén reivindican, de acordo coa normativa vixente, que a Xunta «contemple visitas periódicas de inspección a aquelas empresas que limpan periodicamente as súas instalacións polas necesidades específicas da súa produción».

Noutro escrito dirixido o pasado 7 de outubro ao director de Augas de Galicia, a PDRA advirte que este é «un fenómeno recorrente na costa da ría de Arousa e lembran que a lei establece «que é competencia de Augas de Galicia o exercicio de funcións de policía de vertidos desde terra ás augas do litoral». Denuncian ademais que «non se cumpre co principio de quen contamina paga, o que supón na práctica que en Galicia sae máis barato contaminar e incluso botar directamente ao mar que ter as depuradoras a punto».

Coordinación e recursos

A PDRA exixe «coordinación» de Augas de Galicia coa Consellería do Mar e demanda «os recursos humanos, materiais e técnicos necesarios para controlar eficazmente as verteduras e terra ao mar na ría de Arousa».

O portavoz da plataforma, Xaquín Rubido, subliñou que son «o motor dun dos sectores económicos máis importantes do país, e temos que facer de policías de verteduras porque a Xunta non cumpre coas súas obrigas legais».