Restablecido o subministro de auga en Noia tras tres días arranxando tubaxes

O Concello de Noia confirmou que o servizo de agua potable xa está restablecido en todo o casco histórico, despois de case tres días de traballo para solucionar sucesivas roturas nas tubaxes.

Para intentar evitar novas avarías, a presión da auga "será inicialmente baixa e irase incrementando de maneira progresiva ao longo da semana", indican.

Debido ao mal estado das tubaxes, "non podemos garantir que non volva producirse algunha incidencia nas vindeiras horas, pero o persoal municipal está atento e traballando de maneira continua", subliñan dende o Concello.

Lamentan as molestias ocasionada, "entendemos a frustración xerada e agradecemos aos veciños e comerciantes a súa comprensión, así como aos traballadores o seu esforzo e dedicación", engaden.

Os problemas comezaron o sábado, ás oito da mañá, na rúa Comercio do casco histórico e a longo da fin de semana sucedéronse as roturas de tubaxes da rede de abastecemento. Este luns, pola mañá, rexistrouse unha quinta gran avaría na referida rúa, segundo informou o alcalde, Francisco Pérez.

Unha parte das vivendas e negocios do casco histórico estiveron sen subministro dende as 16.00 horas do domingo, ante a falta de alternativas. Non obstante, algunhas das zonas afectadas "tiveron subministro, non continuo, pero si por momentos", subliñou Pérez.

A orixe desta cadea de avarías, segundo o rexedor, vén motivada por "unha instalación de 60 anos que está moi deteriorada, e que debería ter sido renovada por fases en anos anteriores pero non se fixo".

A primeira rotura rexistrouse ás 8.00 horas do sábado na rúa Comercio e, a partir de aí os problemas sucedéronse. "Ao estar tan deteriorada a rede e ao ter que pechar o subministro para arranxar as avarías, cando se restablecía o servizo a presión do aire acumulado provocou novas roturas, a pesares de que temos purgadores".

As avarías afectaron á zona do Cantón, o Malecón e a porta de Luma, ademais da rúa Comercio onde se produxo a primeira rotura, e tamén a rexistrada este luns.

O alcalde, Francisco Pérez, asegura que os servizos de mantemento "traballaron case sen descanso dende o sábado, e mesmo tivemos que organizar relevos de patrullas".

Plan de Infraestruturas

A solución definitiva ao problema, afirma o rexedor, "pasa por trazar un plan de renovación de infraestruturas e facer unha planificación para poder ir renovando progresivamente a rede de subministro, pero iso é algo que levará 3 ou 4 anos".