Boiro homenaxeará oito fusilados cun ciclo de charlas e un monumento

O Concello de Boiro colabora coa Comisión pola Recuperación da Memoria Histórica do Barbanza na organización, os días 21 e 22 de febreiro, dunhas xornadas en homenaxe a boirenses fusilados.

As xornadas inauguraranse o sábado 21 ás 11.00 horas no Pazo de Goiáns. Antonio Míguez impartirá a charla A represión franquista en Boiro e na comarca do Barbanza (1936-1939) e Xosé Deira e Rocío L. Yáñez, a titulada As vítimas boirenses de Boisaca: biografías e contexto histórico.

Logo dun diálogo con familiares das vítimas e investigadores locais realizarase un roteiro polos lugares da memoria histórica de Boiro. O acto central de homenaxe terá lugar o domingo día 22 no cemiterio de Boisaca, ás 12.00 horas, coa inauguración dun monumento memorial e unha ofenda floral na que participarán o alcalde de Boiro, José Ramón Romero, e a alcaldesa de Santiago, Goretti Sanmartín, acompañados dos familiares das vítimas e de varios membros da Comisión pola Recuperación da Memoria Histórica.

«Trátase dunha xornada en memoria concreta de vidas truncadas pola represión franquista», sinalan dende a Comisión.

Cos actos organizados renderase homenaxe a Rodrígo Álvares Gantes, Braulio Castro Gallardo, Ramón Lojo Agrelo, José Maceiras Vilasó, Santiago Miranda Lago, Juan Outeiral Outeiral, Juan Bautista Torrado e Gerardo Piñeiro Piñeiro.

«Os fusilamentos de veciños de Boiro no cemiterio de Boisaca constitúen un dos episodios máis significativos da represión franquista exercida contra a sociedade civil do Barbanza durante a Guerra Civil», sinala a entidade.

O alcalde, José Ramón Romero, agradeceu o traballo da Comisión pola Recuperación da Memoria Histórica do Barbanza «para a organización deste acto de xustiza e recordo aos boirenses fusilados e recordar de onde vimos, porque é a única maneira de que non volva acontecer».