Caldo de Gloria, versos e unha roseira na honra de Rosalía de Castro en Ribeira

O Concello de Ribeira celebrará a Semana de Rosalía cunha programación para todos os sectores da poboación, con actividades institucionais, educativas, culturais e gastronómicas.

Os actos comezarán o luns 23, coincidindo coa data do nacemento de Rosalía, cunha homenaxe ás 12.00 horas na Casa da Xuventude. Procederase á plantación dunha roseira na súa memoria. A xornada estará acompañada polo son da gaita e, ao remate dos discursos, soará o Himno Galego.

Exposición na biblioteca

Ese mesmo día, a biblioteca municipal acollerá unha exposición bibliográfica dedicada á autora, co obxectivo de afondar no coñecemento da súa obra e legado.

Tamén o 23 de febreiro, a hostalería local súmase á conmemoración a través da iniciativa Caldo de Gloria, promovida pola Fundación Rosalía de Castro. Os establecementos A Recoveira, O Castelao, Tagen Ata, Cocoluche e Zum-Zum ofrecerán á súa clientela esta tapa gratuíta, contribuíndo así á popularización da celebración.

Uxía Senlle

A programación continuará o 26 de febreiro cunha actividade de promoción da lingua galega dirixida ao público escolar. Ás 11.30 horas, o Centro Cultural Lustres Rivas acollerá o concerto Rosalía pequeniña, da recoñecida artista Uxía Senlle. Ao redor de 500 nenos e nenas de todos os centros de ensino de Ribeira asistirán acompañados polo seu profesorado. Pola tarde, ás 20.00 horas, o referido centro acollerá unha lectura pública dos versos de Rosalía.

A programación pecharase o día 28 co espectáculo Dende Rosalía, a cargo de Xanela do Maxín.