O BNG denuncia no Parlamento galego as deficiencias de accesibilidade no centro médico de Corrubedo

O BNG rexistrou unha iniciativa parlamentaria para denunciar as deficiencias en materia de accesibilidade do centro de saúde de Corrubedo (Ribeira), e reclama á Xunta actuacións que garantan o acceso universal ás instalacións.

A deputada do BNG no Parlamento galego Rosana Pérez alerta de que na actualidade “para acceder ás consultas médicas e ao mostrador de atención é necesario subir unhas escaleiras interiores, sen que exista ningunha alternativa adaptada como unha rampla ou un sistema salvaescaleiras”. Unha situación que cualifica de “inaceptable nun servizo público esencial como é a sanidade”.

Pérez subliña que esta realidade supón “unha vulneración clara do dereito á accesibilidade universal”, afectando especialmente ás persoas con mobilidade reducida, ás persoas maiores ou a quen emprega cadeira de rodas. “Non se pode consentir que, en pleno século XXI, haxa persoas que non poidan acceder con normalidade ao seu centro de saúde”, engadiu.

Ademais, a deputada nacionalista denunciou que “son os propios profesionais sanitarios ou as persoas acompañantes quenes teñen que subir e baixar a man as persoas con mobilidade reducida”, algo que considera “indigno e impropio dun sistema sanitario público que debe garantir a igualdade de trato”.

Pola súa banda, o portavoz municipal do BNG en Ribeira, Luís Pérez Barral, puxo o foco na importancia deste centro sanitario para a veciñanza. “O centro de saúde de Corrubedo presta servizo a veciñas e veciños de Corrubedo, Olveira e Artes, polo que propoñemos que se manteña en boas condicións”, afirmou.

Barral reclamou que se actúe para eliminar as barreiras arquitectónicas existentes e dotar o centro dos investimentos necesarios. “A loita da veciñanza fixo que a Xunta non pechase este centro e a Xunta debe investir recursos para garantir un dereito básico como é o acceso á sanidade pública en condicións de igualdade”, destacou.

A iniciativa do BNG solicita á Xunta a elaboración e execución dun plan de actuación que inclúa a instalación dunha rampla accesible, un sistema salvaescaleiras ou calquera outra solución técnica que permita eliminar as barreiras existentes.

Así mesmo, demanda a consignación de partidas orzamentarias suficientes para acometer as actuacións necesarias que melloren o estado xeral de conservación, mantemento e modernización do centro.

Unha reforma en estudo

Pola súa banda, a alcaldesa de Ribeira, María Sampedro, dixo que "a Xunta de Galicia continúa avaliando as posibilidades para a eliminación das barreiras arquitectónicas no centro de saúde de Corrubedo", que visitou o pasado 24 de febreiro co xerente da Área Sanitaria de Santiago de Compostela e Barbanza, Ángel Facio, con persoal técnico da Consellería de Sanidade, coa enxeñeira municipal e con profesionais do propio centro.

Sampedro dixo que durante o encontro de traballo analizaron "o estado do centro para que sexa accesible na súa totalidade, incluíndo a parte baixa, coa finalidade de estudar as diferentes alternativas posibles de remodelación do inmoble, ademais de recoller as demandas dos propios traballadores do centro de saúde".

"Queremos mellorar as prestacións á veciñanza e isto pasa tamén pola mellora de infraestruturas para garantir a accesibilidade universal", indicou a rexedora, engadindo que "a Xunta está avanzando cara a acometer unha reforma neste ambulatorio unha vez os técnicos rematen cos informes e a tramitación".