Muros pon a punto as zonas verdes tras os temporais do inverno

O Concello de Muros realiza desde hai semanas traballos de mantemento e posta a punto das zonas verdes, tras un inverno marcado polos temporais e as intensas chuvias.

Dende a Concellería de Obras e Servizos leváronse a cabo nestes días labores de mantemento na zona do cemiterio de Atalaia, na área de lecer do Pozo de Cachón, en Agro Vello (Tal), en Ventín ou en Esteiro (paseo fluvial do río Riomaior, áreas recreativas da alameda e do Artón, e en Parameán), entre outras localizacións.

“Estes traballos realízanse tanto con medios propios, a través do persoal da brigada municipal, como coa colaboración de empresas externas, co obxectivo de abarcar o maior número de espazos posible”, explica Laura Rivadeneira, concelleira de Obras e Servizos.

A alcaldesa, María Lago, explica que “o obxectivo destas actuacións é mellorar o estado xeral dos noso espazos naturais e garantir que a veciñanza e visitantes poidan gozar dun entorno coidado, cómodo e seguro, especialmente nestas datas nas que aumenta o seu uso”.

Os traballos continuarán durante as próximas semanas nas praias e zonas verdes de todas as parroquias de Muros.