Remata no Porto do Son a recuperación do litoral entre Xuño e as lagoas de San Pedro

Nas últimas datas remataron no Porto do Son os traballos de restauración e recuperación das zonas costeiras, realizados desde Xuño ata as lagoas de San Pedro, nos areais de Furnas a Seráns.

Este proxecto, financiado a cargo do Ministerio para la Transición Ecológica y el Reto Demográfico con fondos Next Generation da UE do Plan de Recuperación, Transformación e Resiliencia, contemplou a protección e restauración destas zonas costeiras, adaptándoas para o cambio climático e implementando estratexias mariñas e plans de ordenación do espazo marítimo.

Esta actuación perseguiu varios obxectivos, como loitar contra a erosión na costa, aumentando a súa resiliencia e fortalecemento do litoral fronte aos efectos do cambio climático.

Así, levouse a cabo a instalación de novas pasarelas de madeira a ras de chan e de nova sinalización, así como e eliminación de plantas invasoras.

Tras o remate do proxecto, o alcalde, Luís Oujo, agradeceu esta achega do Ministerio “que é fundamental para a recuperación ambiental deste espazo e que ademais xa está rematado e chega a tempo para a tempada de verán”.

O rexedor tamén lembrou “a importancia que ten esta actuación tanto a nivel medioambiental como para o uso e deleite deste fermoso espazo natural por parte da veciñanza e turistas”.