A Xunta inviste 270.000 € na reposición dos muros da pista do instituto do Porto do Son

A Xunta de Galicia vén de adxudicar por case 270.000 euros a obra do peche lateral da pista do instituto do Porto do Son, que realizará a empresa Construcciones Iglesias Mera. O prazo de execución da actuación, unha vez se inicien os traballos, é de tres meses.

O obxectivo da intervención é arranxar os muros derrubados polos temporais en outubro de 2024, e protexer a pista da climatoloxía e da entrada de persoas alleas ás instalacións docentes.

Paneis prefabricados

Para dar resposta a estas necesidades, proxéctase un peche dunha altura de 3,75 metros, con paneis prefabricados de formigón, e desde os paneis ata a altura de cuberta con chapa ondulada microperforada de aluminio, que permita a iluminación, ventilación e a protección das choivas laterais.

Tamén se instalarán os canlóns e as baixantes para a evacuación das augas pluviais e colocarase unha nova cuberta de panel sándwich nos vestiarios.

A actuación enmárcase nas primeiras 16 obras programadas pola Consellería en centros de ensino para este ano, cun investimento total de máis de 16 M€. No conxunto do ano, o investimento da Xunta en obras en centros educativos ascenderá a un total de 73,6 M€, un 4% máis.

Investimento de 8,5 M € no Barbanza

A Xunta está a investir máis de 8,5 M€ en obras en centros educativos na área do Barbanza ao abeiro do Plan de nova arquitectura pedagóxica. Ademais desta actuación, en O Porto do Son acometeuse o cambio de cuberta do instituto da localidade (422.000 €), así como o do Colexio Santa Irene (260.000 €).

Así mesmo, acometéronse obras de tanta importancia como as rehabilitacións integrais do IES da Pobra do Caramiñal (2 M€), do IES Plurilingüe Fontexería (Muros, 1,4 M€), do CEIP Alfonso Daniel Rodríguez Castelao (Rianxo, 1 M€) e do CEIP Plurilingüe de Frións (Ribeira, 655.000 €).

A maiores, está tamén en licitación a rehabilitación integral do CEIP Plurilingüe Praia Xardín (Boiro, 1,1 M€).