Ribeira abre as páxinas de Otero Pedrayo nunha emotiva lectura colectiva das súas obras

Preto de corenta persoas do Club de Lectura da Asociación Amas de Casa de Ribeira participaron nunha lectura compartida sobre a obra en prosa de Ramón Otero Pedrayo, con motivo da conmemoración do 50º aniversario do seu pasamento.

A técnica municipal do Servizo de Normalización Lingüística, Alicia Padín, abriu o acto, no que os asistentes leron fragmentos das novelas Os camiños da vida e Arredor de sí, con guión elaborado por Ángeles González, integrante do club de lectura.

Ao acto sumáronse a alcaldesa, María Sampedro; o concelleiro de Servizos Sociais, Vicente Mariño; e a edil de Educación, Nucha Brión. A rexedora puxo en valor este tipo de iniciativas que contribúen a preservar o legado de escritores e coñecer máis a fondo a súa produción literaria.

"Trátase dunha acción máis das múltiples que pon en marcha a Asociación Amas de Casa, desta vez, coa lectura como punto de encontro e de difusión de coñecemento. A elección do escritor é moi acaída, pois neste 2026 celebramos o Ano Oteriano e puidemos mergullarnos nas palabras de dúas célebres novelas súas ao tempo que dinamizamos o uso da lingua galega", subliñou María Sampedro.