Ribeira convértese esta fin de semana no escaparate do vehículo híbrido e eléctrico

Ribeira acolle esta fin de semana a VII Feira do vehículo híbrido e eléctrico, na que participan dez concesionarios e trece marcas. Estará aberta ao público na Praza de España ata o domingo, de 11.00 a 20.00 horas, con entrada gratuíta.

O acto inaugural estivo presidido pola alcaldesa, María Sampedro, o presidente da Asociación de Empresarios de Ribeira, Francisco Martínez Gude, e o director xeral de Planificación Enerxética e Minas, Pablo Fernández Vila, quen apuntou que se Galicia quere avanzar na descarbonización da súa economía "a transición ao ecosistema de mobilidade eléctrica e conectada é fundamental".

Vehículos menos contaminantes

Fernández Vila lembrou que o Goberno galego está a facer unha clara aposta por incentivar a compra de vehículos menos contaminantes e eficientes a través do programa Renova o teu vehículo, que na última edición axudou a que os datos de matriculacións nos catro primeiros meses do ano en Galicia tiveran un repunte do 25%, tres veces máis que a media nacional.

Aproveitou para subliñar que os apoios da Administración autonómica esténdense a todo o sector da automoción e non só ao consumidor final, grazas a un Plan director que se articula en torno a 67 medidas e que conta cun orzamento que supera os 230 millóns de euros.