Boiro eleva o listón das festas do verán: Panorama, París de Noia, Satélites, 9Louro e Tributo a Julio Iglesias

O alcalde de Boiro, José Ramón Romero, e a concelleira de Cultura, María Outeiral, presentaron este luns o programa das festas do verán, que comezarán o venres 3 de xullo ás 20.30 horas co pasarrúas da charanga BB+ e a posterior actuación da orquestra Suavecito na Praza de Galicia.

O pregón (22.00 horas) correrá a cargo de representantes do comercio tradicional da localidade, colectivo ao que se rende homenaxe este ano.

Logo, a festa continuará da man da orquestra Capitol (na Praza de Galicia), Curi e Sound Ivan (na praza do centro social) e o Remember Fest organizado pola asociación Peñas Boiro (no Parque da Cachada).

O sábado 4 haberá a tradicional Festa da Malla (ao mediodía, amenizada por Xilbarbeira e Aroña), e pola tarde, actuación da orquestra Finisterre Project e Tributo a Julio Iglesias , a cargo de Jorge Goes, (á medianoite, na Praza de Galicia). Ortiga amenizará a noite na Praza da Terceira Idade.

O domingo 5, pola mañá, haberá alboradas con Ar de Loureda; baile con Abeloura, Ballet Folclórico Boirense e Abanqueiro; pasarrúas da Banda de Negreira; e sesión vermú na rúa peonil con D’Crooners.

O plato forte da xornada dominical será o gran espectáculo piromusical na praia de Barraña; a verbena estará amenizada polas orquestras La Oca Band e La Banda de Ayer (na Praza de Galicia) e Balbina, coa Banda de Música de Boiro (na praza do centro social).

O luns 6, ao mediodía serán os Cantos de Taberna, con As da Boina e Mar de Cabo, e Peñas Boiro celebrará o Día das Peñas no Parque da Cachada. E, pola noite, Gramola Gominola actuará na praza do centro social, e as orquestras Gran Parada e Origen na Praza de Galicia.

O martes día 7 volverán ao mediodía os Cantos de Taberna con A Dorniña e Xoaniñas, e haberá pasarrúas de Treboada. Pola noite serán as orquestras Marbella e París de Noia as que protagonicen a verbena na Praza de Galicia, e Melidaos e Lumieira na Praza da Terceira Idade.

O mércores 8 os Cantos de Taberna correrán a cargo de Nunca é tarde e Ventos do mar, e a sesión vermú na rúa peonil estará amenizada por Duendeneta. Pola noite haberá un gran fin de festa con 9Louro na Praza da Mancomunidade; e verbena coas orquestras Panorama, América e Satélites na Praza de Galicia.

“Todos os días se reparten as actuacións en distintos escenarios pensando nos distintos públicos; deseñamos un programa pensando en todos os gustos e idades”, afirmou María Outeiral.

O alcalde, José Ramón Romero, convidou a veciñanza de Boiro e arredores a gozar “deste gran programa de actividades que mestura grandes orquestras con actuacións de grupos locais e outras propostas para todos os gustos”.