Estas son as gañadoras da nova campaña da patronal de Boiro, que rexistrou máis de 2.300 tíckets de compra

A Asociación Boirense de Empresas (ABE) celebrou este venres o sorteo correspondente á primeira quincena da campaña Quincenas fantásticas, unha iniciativa de dinamización comercial que continúa consolidándose como unha das accións de maior participación entre a clientela do comercio local.

Nesta primeira fase da campaña, desenvolvida entre o 1 e o 16 de xullo, rexistráronse 2.353 tíckets de compra, unha cifra que supón o mellor resultado da historia da campaña nunha primeira quincena.

O dato supera en máis de 300 participacións o anterior récord desta primeira fase e queda a menos de 50 rexistros do récord absoluto acadado por calquera quincena desde a creación da iniciativa, confirmando a excelente resposta tanto da clientela como dos máis de 215 establecementos asociados que participan na campaña.

No sorteo celebrado este venres repartíronse 500 euros en vales de compra. O primeiro premio (250 €) foi para Kepa Mirena, por unha compra realizada en Beltane Neotaberna; o segundo (150 €), para Lourdes Moscoso, por unha compra realizada en Paquetería Josefina; e o terceiro (100 €), para Ángela Fernández, por unha compra realizada en Drolim.

O presidente da ABE, Daniel García, amosou a súa satisfacción polos resultados obtidos e destacou que "alcanzar as 2.353 participacións nesta primeira quincena é unha magnífica noticia para os negocios de Boiro. Máis alá do récord, o verdadeiramente importante é comprobar que milleiros de persoas continúan apostando polos nosos negocios de proximidade e participan activamente nas campañas que organizamos para agradecer esa confianza".

A campaña continuará aberta ata o 3 de agosto, polo que todas as compras realizadas entre o 17 de xullo e o 2 de agosto poderán participar no segundo e último sorteo desta edición, no que volverán repartirse 500 euros en Bonos ABE, distribuídos en premios de 250, 150 e 100 euros.

Dende a ABE anímase tanto á veciñanza como ás persoas que visitan Boiro durante o verán a seguir mercando no comercio local e rexistrando os seus tíckets a través da aplicación dispoñible na páxina web da entidade.

As Quincenas fantásticas están financiadas pola Xunta de Galicia dentro das accións de apoio ao comercio de proximidade e constitúen unha iniciativa que busca non só incentivar as compras, senón tamén agradecer a fidelidade da clientela e facer que o investimento realizado nos negocios locais reverta de novo no propio tecido comercial de Boiro.

Con este espectacular inicio, a campaña afronta a súa segunda metade cun obxectivo ao alcance da man: superar por primeira vez a barreira das 4.500 participacións nunha mesma edición e establecer un novo récord histórico, consolidando as Quincenas fantásticas como unha das campañas de dinamización comercial con maior resposta do municipio.