Segue a troula dorneira en Ribera co 'Día do Orjullo Jaiteiro'

A música tradicional soa este sábado en cada rincón da cidade de Ribeira, onde once agrupacións folclóricas participan no Día do Orjullo Jaiteiro, no marco da Festa da Dorna.

Desfilando a pé polas rúas ou mesmo a bordo dun remolque, a música inunda o centro de Ribeira a cargo de Borja & Cía, Os Liantes, Suabesebe, Enxebres de San Lázaro, Tahúme, Laghareu, Trécola, Riparia, Río de Anxo, a banda de gaitas Estivada de Calo e Os Festas.

Todas estas formacións concentráronse despois na Praza da Porta do Sol para actuar sobre un escenario.

Outra das citas deste sábado é a Xuntansa de embarcacións tradisionais e, pola tarde, celebraranse os Xojos populares de terra, en Coroso.

Este domingo 19 será o Jran prix de carrilanas (18.30 horas), e pola noite o concerto de De Ninghures na Praza da Porta do Sol, no marco do festival Rockandorna, no que ata o día 24 se sucederán tamén as actuacións de Lamatumbá, Muyayo Rif, Dakidarría, Reality, Cocco Lexa, Neverloura, Habelas Hainas e Extremodorna, ademais de varios DJ's.

O luns 20 a diversión chegará cos Xojos de mar dorneiros (16.00) e o Jran premio Ícaro de voo sen motor  (19.00).

O martes 21 ás 21.00 horas será a final do Sertamen itinerante de cansión de tasca, e o mércores 22 a Batalla dos jallos dorneiros (ás 00.30 horas en Coroso).

O xoves 23, ás 22.30 horas, no Malecón, os patróns e patronas das novas peñas deberán someterse ao Exame de patróns para poder pasar a formar parte oficialmente da gran familia doneira.

Finalmente, o venres 24, pouco antes das tres da tarde, dará comezo en augas de Coroso a Rejata Cutre Shark de embarcasións feitas á machada e propulsadas a pan de millo.

A Cooperativa do Mar Santa Uxía ofrecerá unha degustación gratuíta de Lirio de Ribeira.

A Romaría Dorneira, a Festa da Espuma, o desfile Top Secret, unha nova cita co Rockandorna e o Asalto ás fanequeiras porán o broche final a esta Festa da Dorna 2026.