A campaña municipal sobre rodas

Dende os habituais coches de campaña cos altofalantes na parte superior ata tractores que van polas parroquias con carteis laterais pegados coas caras dos candidatos, os partidos políticos que concorren ás municipais do domingo na Área de Compostela esméranse por levar os seus programas electorais a todos os recunchos dos seus municipios.

Exemplo chamativo de campaña sobre rodas é o de Espazo Común de Santa Comba, onde un grupo de mozos está a saír cos seus tractores, preparados cuns megáfonos para dar a coñecer os mítines e a programación electoral do partido. O alcaldable por esta formación, José Antonio Ucha Vela, explica que “foi unha idea dos chavales, que ademais son os que levan o tractor por todo o municipio”. E se isto é posible é porque estes voluntarios “proceden de familias con explotacións gandeiras”.

Máis clásico é o caso de Negreira, onde sae José Antonio Martínez, que vai ao volante do coche de campaña do Partido Popular. Este explica que xa o fixo nas eleccións municipais de 2019 e que se trata dun traballo “no que hai que ter moito respecto, ser moi educado e ter en conta os horarios dos veciños”. “O domingo ao pasar pola igrexa tes que apagar a megafonía, hai que respectar á xente que está alí dentro, ou cando vas dunha parroquia a outra e atopas alguén levando as vacas, hai que quitar o volume e esperar”, engade.

Deste xeito, Martínez sinala que cando vai no coche os veciños “paran a saudar, tamén che fan preguntas e ti tes que baixar do coche e falar con eles”. “Moitos veciños nas parroquias son maiores e non ven a ninguén en todo o día, hai que ter sensibilidade coa xente, e explicarlle que se quere facer un centro de día”, apunta a este xornal. Así mesmo, subliña que “saio todos os días no coche durante a campaña”. En canto ao número de horas detalla que “depende da xornada” e “tendo en conta sempre as costusmes dos veciños, non vas pasar á hora da sesta”.

No caso da campaña de Espazo Común de Santa Comba, Velo Ucha remarca que ir en tractor “é un xeito de chamar a atención polo rural, porque as metrópolis impoñen as súas leis e non hai que esquecer que as vilas, aínda que somos minoría en voto, somos maioría en territorio e o rural existe”, puntualiza.

Nesta liña, este alcaldable xalleiro fai fincapé en que “polo resto facemos o normal que se fai en campaña”, aínda que destaca que “hai que saber chamar a atención: noutras eleccións paguei un cartel ao dereito e outro ao revés”. “Con todo, agora a gran pelexa está nas redes sociais, tamén o porta a porta desparece e nun sitio pequeno no que todo o mundo se coñece pode ter efectos contraproducentes”, explica o candidato de Espazo Común.