Xosé Manuel Beiras voltou á arena política para arroupar a Anova en Val do Dubra

O tan polémico como histórico líder do nacionalismo galego, Xosé Manuel Beiras, participou nun único acto político diante das vindeiras eleccións municipais: o que celebrou Son de Dubra-Anova na localidade valdubresa de Portomouro. Así, e cun auditorio entregado, Beiras aportou o seu gran de area á campaña dun incombustible Antonio Negreira que quere retornar á alcaldía cun programa no que os servizos, infraestruturas e medio ambiente son pedras angulares.

“Queremos intentar recuperar o Val do Dubra que retrocedeu na pandemia co Partido Popular”, aseveraba o líder nacionalista local, laiándose de que ese retroceso implicara “a perda de actividade económica”. A súa intención pasa por “converternos nun Concello activo, alegre e con servizos ao pé de Santiago de Compostela”, retornándolle “os valores paisaxísticos e ambientais”.

Ademais, e diante dun auditorio que conformaron simpatizantes e curiosos na parrillada San Cristóbal, Negreira enumerou algúns dos seus alicerces programáticos, como poden ser “a rehabilitación de núcleos con servizos básicos” e tamén darlle a importancia que merecen “aos nosos maiores, xa que en Val do Dubra máis dun 31 por cento da poboación son xubilados, e precisamos un centro de día de inmediato”.

Polígonos

Tivo tamén lembranza o candidato para a actividade económica local, que pretende reactivar “vinculándoa co polígono compostelán e coa posta en marcha de solo industrial no noso municipio”. Outras partes importantes do seu programa pasan por “mellorar infraestruturas viarias cara a Carballo e a capital galega”, sen esquecer “a humanización das travesías principais de Bembibre e Portomouro”, as dúas localidades principais nun Concello que rolda os 3.800 habitantes e que esta conformado polo val que orixina o río Dubra (antes chamábase Buxán).

No acto central, Antonio Negreira estivo acompañado por Iván Barcía, o número dous da candidatura en representación de Portomouro e o seu posible relevo en vindeiras eleccións. Anteriormente pasaron por Val do Dubra Martiño Noriega, Concha Fernández ou Antón Sánchez.