Os ‘peregrinos musicais’ fan escala no Pazo da Peregrina de Bertamiráns

O XIII Festival Peregrinos Musicales ultima xa todos os preparativos para a súa posta en marcha. Unha das actividades centrais das dúas semanas de intenso programa será o tradicional concerto da Real Filharmonía de Galicia, o 11 de xullo no Auditorio de Galicia ás 20.30 horas, e contará coa participación dos seis intérpretes galardoados no Certame Internacional de Novos Talentos Peregrinos Musicales.

As outras sete xornadas musicais que ofrecerá o festival desenvolveranse entre o 29 de xuño e o 14 de xullo. E este ano, como novidade, ademais de ter lugar en espazos emblemáticos da capital galega, algúns concertos desenvolveranse tamén no Pazo da Peregrina de Bertamiráns, en datas aínda por confirmar. No evento musical participará, ademais da Real Filharmonía de Galicia, un elenco de participantes moi variado e repleto de talento: o dos seis galardoados no Certame Internacional de Novos Talentos Peregrinos Musicales. Entre eles, atópanse dous galegos, os pianistas Cristina Bernal (Culleredo) e Yuri Durán (A Pobra do Caramiñal). Acompañaranos os vascos Pablo López (clarinete) e Nerea Arriola (violín), así como o alemán Emanuel Sint (fagot) e a ucraína Sonya Zholoboba (piano). E no aque atinxe ao acceso, será de balde.