Rescatan un home no mar fronte á costa de Dumbría e trasládano en helicóptero

Varios particulares rescataron do mar fronte á costa do municipio coruñés de Dumbría un home que se meteu na auga nun peirao situado nas proximidades da praia de Ézaro. Segundo trasladou o 112 Galicia, pouco despois das 11:00 horas deron aviso ao 112 desta situación. Nesta comunicación, a persoa que alertou indicou que acababa de presenciar como un home se metía na auga neste punto e a corrente parecía arrastralo.

Con esta información, os operadores do 112 pediron a colaboración dos servizos sanitarios, de Salvamento Marítimo, do Servizo de Gardacostas de Galicia, dos Bombeiros de Cee e dos axentes da Garda Civil de Tráfico.

Pouco despois confirmouse que os particulares que estaban na zona axudaron a saír da auga o implicado. Con todo, a ambulancia do 061 só se podía achegar a uns 100 metros de distancia e, debido ás dificultades do terreo, enviouse até o punto ao helicóptero de rescate de Salvamento Marítimo, no que finalmente foi evacuado.