Vermú literario e musical en Carnota

A praza de San Gregorio de Carnota foi escenario do Vermú Literario e Musical organizado pola Escola Municipal de Música e a Axencia de Lectura Municipal, xunto coa Libraría Chorima. A xornada comezou coa presentación da novela Carburos é o meu dios (Editorial Medulia), de Guadalupe Vázquez Formoso, que estivo acompañada polo alcalde, Juan Manuel Saborido.

'Carburos é o meu Dios', a segunda novela de Guadalupe Vázquez Formoso, rescata unha parte da historia de Cee

Carburos é o meu dios é unha novela curta ambientada en Cee, no Salto de Castrelo e no Monte do Pindo, na época da construción da canle de auga para a central eléctrica do Xallas que abastecería de enerxía a fábrica de carburos. A autora carnotá explicou que a obra pretende ser unha lembranza histórica e unha homenaxe aos traballadores do Salto de Castrelo e tamén aos da fábrica, coma seus avós, Gerardo Parga Sánchez e Manuel Vázquez Trillo, coñecido polos compañeiros como O Carnotán.

Trala sinatura de exemplares pola autora, celebrouse o concerto Musicando as Letras Galegas, coa actuación das Pandeireteiras e a Coral Polifónica Mar de Ardora da Escola de Música de Carnota, que rematou cunha emotiva interpretación do himno galego.