Carballo suaviza o trazado, anchea e asfalta en dez quilómetros de tres estradas estruturais

O Concello de Carballo acometerá nos vindeiros meses tres importantes proxectos viarios cun investimento total de 1.104.078 euros. O obxectivo das actuacións é seguir acondicionando as vías consideradas estruturais, ben polo intenso uso que teñen ou ben por unir parroquias, aumentando o ancho da calzada cando é posible e pavimentándoa en todos os casos con aglomerado en quente.

Antes de que remate o ano podería estar materializado xa o primeiro proxecto, que enlaza As Labradas (Carballo) coa Ponte de Bértoa. As obras, que teñen un orzamento de 207.666 euros, foron adxudicadas á empresa Vázquez y Reino e o seu comezo é inminente. O prazo de execución previsto é de tres meses.

Os traballos, que teñen como finalidade regularizar o trazado e mellorar a seguridade viaria, consistirán na limpeza das gabias ao longo dos 2.050 metros de vía, que nalgúns puntos poderá ampliarse para conseguir unha media de seis metros de ancho en todo o percorrido.

Posteriormente procederase ao estendido dunha nova capa de rodaxe con mestura bituminosa en quente de cinco centímetros. En total pavimentarase unha superficie de 12.900 metros cadrados. Tamén están incluídas a drenaxe de pluviais e a sinalización horizontal e vertical.

En breve será adxudicado tamén o proxecto de mellora da estrada de Arnados (Razo) a Sambade (Rebordelos), ao que optan catro empresas e que ten un orzamento de 576.614 euros. A actuación será moi semellante á anterior, con ampliación do ancho da calzada onde sexa posible, limpeza de gabias e unha capa de aglomerado nunha superficie de 26.000 metros cadrados.

Comezan en Carballo as obras de derrube dun edificio para poñer fin aos asolagamentos

Ao longo dos 4.675 metros de vía tamén se procederá á drenaxe de pluviais e á sinalización horizontal e vertical. Ademais, está prevista a construción de dous muros de coieira de 20 e 40 metros de longo e 1 de alto no treito comprendido entre os lugares do Igrexario e Sambade, e no lugar de Arnados construirase unha senda peonil, na marxe esquerda, nunha lonxitude de 230 metros. Tanto en Arnados como no Igrexario de Lema está previsto realizar a pavimentación con formigón, seguindo o modelo que se está a utilizar nos núcleos rurais tradicionais.

A terceira actuación en marcha é a segunda fase da vía que enlaza as parroquias de Rus e Entrecruces. Despois do investimento realizado entre as localidades de Canosa e Pereiro Vello, que superou os 230.000 euros, agora mesmo está en licitación o treito que vai desde Pereiro Vello ata Outón, cun orzamento de 391.797 euros. O investimento total nesta vía superará, polo tanto, os 600.000 euros.

A actuación desenvolverase ao longo de 3.330 metros de vía do mesmo xeito que as anteriores, con limpeza de gabias, drenaxe e estendido de aglomerado nunha superficie de 22.725 metros cadrados.

Na zona de cruce da vía cos ríos Calvos e Vilar de Cima está previsto un sobreancho dun metro por cada marxe. Asimesmo, no lugar do Outón será preciso construír un muro de coieira de 35 metros de lonxitude e algo menos de 3 de alto, segundo explican ao respecto dende o executivo municipal.

As empresas interesadas en optar ao concurso para a adxudicación destas actuacións teñen de prazo para presentar as súas ofertas ata o vindeiro día 25 deste mes.