Oroso e Sogama colaborarán nun programa de compostaxe nunhas cincuenta vivendas

O Concello de Oroso decidiu este luns pasar a formar parte do programa de compostaxe doméstica que promove a empresa pública xestión de residuos Sogama, no cal se involucrarán ata cincuenta vivendas unfamiliares deste municipio con xardín ou hortas nas que aplicar os produtos resultantes da reciclaxe de materia orgánica.

Con esta iniciativa, Oroso procura “dar un paso máis cara á xestión sostible dos residuos”, defendeu a administración municipal nun comunicado, no que tamén incidiu na importancia de reducir a cantidade de residuos xerados e reciclar maior parte dos mesmos. Por este motivo, valoraron positivamente a instalación destes sistemas para fabricar compost nos fogares, un “abono natural con excelentes propiedades nutritivas para o solo ao que, ademais, protexe fronte a pragas e enfermidades”.

La Xunta pondrá en marcha la primera planta de residuos textiles en las instalaciones de Sogama en Cerceda

Sogama subministrará de forma gratuíta ao concello un total de cincuenta composteiros fabricados con materiais reciclados e reciclables, con capacidade para 400 litros. Do mesmo xeito, tamén entregará “materiais didácticos de apoio” cos que axudar aos participantes no programa e ofrecerase para impartir un curso de formación presencial, con técnicos da propia sociedade de xestión de residuos, no que a veciñanza poderá coñecer os métodos empregados de primeira man e resolver as súas dúbidas.

O obxectivo último e a recuperación paulatina dunha “práctica tradicional no rural galego” e da que se volve facer uso “dunha forma máis cómoda, hixiénica e eficiente”. Os usuarios deberán comprobar o osíxeno, a temperatura e a humidade dos seus dispositivos, parámetros “de gran importancia para que o compost resultante sexa de alta calidade e cumpra con todos os requisitos normativos para ser utilizado, con garantías e sen restriccións, na agricultura e en xardinería”.