Arrincan as obras de humanización da contorna do Faro de Corrubedo para mellorar a súa accesibilidade

Durante o pasado mes de agosto, o tripartito de Ribeira adxudicou á empresa Construcciones Fermín Simal SL as obras de mellorar da accesibilidade na contorna do Faro de Corrubedo por un importe de 77.962 euros e un prazo de execución de dous meses. Nestes últimos días comezaron as obras, avanzando, ata o momento, a bo ritmo.

Esta actuación incluese no convenio asinado no 2022 entre a Axencia de Turismo de Galicia e o Concello co obxectivo de executar o Plan de Sustentabilidade Turística de Ribeira no marco do Plan de Recuperación, Transformación e Resilencia, financiado pola Unión Europea Next Generation EU.

Con este proxecto preténdese mellorar a accesibilidade e humanizar os espazos nas inmediacións do Faro, un dos grandes emblemas turísticos do municipio. Esta primeira fase de actuación afectará a un tramo da beirarrúa de 713 metros de lonxitude, ensanchandose a súa plataforma actual, que pasará de 1,50 a 2,50 metros. Así mesmo, tamén se mellorará o pavimento, substituíndo o actual de aglomerado asfáltico, por outro novo de formigón puído, con bordo de formigón.