O Concello de Padrón pecha en Riga o proxecto europeo 'Reforzando a identidade europea en tempos de crise'

O alcalde de Padrón, Anxo Arca, participou durante o pasado mes de setembro no quinto e último encontro do proxecto europeo 'Reforzando a identidade europea en tempos de crise', que se celebrou en Riga, Letonia. O proxecto reuniu a 63 participantes de 16 países europeos para debater sobre os principais desafíos europeos, o papel do liderado feminino e o compromiso democrático.

Xunto ao rexedor padronés, no encontro tamén estiveron presentes a concelleira Laura Horta e o técnico de Turismo Alberto Rey. Esta iniciativa, que conta cun financiamento de 145.000 euros, é o primeiro proxecto aprobado pola UE a un concello galego dentro do programa Cidadáns, Igualdade, Dereitos e Valores da Rede de Cidades da UE. O obxectivo é fomentar a cooperación intermunicipal e fortalecer os valores europeos comúns, promovendo o coñecemento dos dereitos da cidadanía europea e a boa gobernanza local.

Durante o seu discurso, o alcalde de Padrón destacou a relevancia de reforzar os valores europeos nun contexto global de incertezas. "Nun mundo marcado por desafíos, o noso compromiso cos valores de solidariedade, democracia e dereitos humanos faise máis crucial que nunca", sinalou.

O encontro congregou a empresarios, líderes políticos e representantes da sociedade civil que discutiron temas chave como o emprendemento, a igualdade de xénero e a participación cidadá. Neste sentido, Arca salientou a necesidade de empoderar ás mulleres europeas, poñendo en valor o talento e a valentía amosados polas emprendedoras presentes. Ademais, tamén fixo un chamamento á necesaria cooperación entre a mocidade, artistas, empresarios e estudantes europeos, que serán os encargados de liderar a visión dunha Europa unida, pacífica e próspera.

A realización deste proxecto deixa as portas abertas a futuras colaboracións entre municipios europeos, establecendo unha base sólida para o diálogo e a cooperación a nivel local e internacional.