Vedra lidera un proxecto europeo de protección das paisaxes agrícolas rurais

O Concello de Vedra foi o encargado de liderar o proxecto europeo winEU.rur, concibido para garantir a protección das paisaxes agrícolas rurais mediante o fomento da gobernanza participativa. Nesta iniciativa participaron municipios e entidades de varios puntos de Europa diferentes: Capannori (Italia), Bolyarovo (Bulgaria), Lendava (Eslovenia), a rexión de Zagorje-Sutla (Croacia) e Lousada (Portugal).

Representantes de todos eles reuníronse a semana pasada en Galicia para poder coñecer de primeira man e sobre o terreo experiencias de boas prácticas relacionadas, por exemplo, ca longa tradición vitivinícola vedrense e o coidado destas paisaxes ao longo do tempo.

Un producto de Vedra es galardonado en los Premios Alimentos de España

Así mesmo, os implicados participaron nun foro que serviu para expor as conclusións e resultados deste proxecto. Nel, ademais, tiveron lugar dúas mesas redondas sobre gobernanza participativa: unha con aportacións de expertos procedentes de diferentes institucións e outra centrada en compartir experiencias que teñen dado bos resultados.

No caso de Vedra, estase a constituír un novo foro de diálogo e de encontro entre diferentes axentes, que integra a representantes do turismo, do sector vitivinícola, do propio Concello e da veciñanza; para seguir avanzando nas pautas de desenvolvemento e coidados das paisaxes marcadas polo programa winEU.rur. Este é o resultado máis tanxible do proxecto, un espazo de participación que seguir consolidando de cara ao futuro.