Rianxo recupera a estrutura orixinal do pazo do Martelo

As obras de rehabilitación do pazo do Martelo, que tratan de recuperar a estrutura orixinal do edificio, ademais de mellorar a súa eficiencia enerxética e accesibilidade, rematarán esta semana. Así llo trasladou o encargado da obra da empresa Sergonsa ao alcalde de Rianxo, Julián Bustelo, e ao edil de Obras, Alberto Angueira.

Rianxo asumirá la rehabilitación del Pazo de Rianxiño para convertirlo en centro de día tras 18 años de espera

Bustelo recorda que a obra rematará no prazo sinalado polo Ministerio de Transportes, Mobilidade e Axenda Urbana, «que nos concedeu un mes de prórroga para acabar a reforma e xustificar a subvención dun millón de euros antes do 31 de outubro». A rehabilitación foi adxudicada en 1.410.912,03 euros e conta cunha subvención de 978.709,98 euros da Unión Europea a través do PIREP (Programa de impulso á rehabilitación de edificios públicos) do Ministerio.

O alcalde resalta que, «para unha obra destas características, ter só un mes de retraso demostra que se están facendo ben as cousas», engade Julián Bustelo.

A rehabilitación ten por finalidade evitar os graves problemas de filtración de auga que estaban a deteriorar o edificio, e recuperar a estrutura orixinal do mesmo, despois da reforma acometida nos anos 80, polo que tamén se eliminaron os balcóns da fachada que dá á ría para recuperar a parede branca con ventás. O proxecto inclúe melloras de eficiencia enerxética e accesibilidade.

O Concello rianxeiro impulsa novas obras de asfaltado en Rianxiño, Brión e A Capela

O interior do edificio, que se levantou a finais do século XVII e principios do XVIII, foi derrubado integramente e reconstruído, con dous andares diáfanos. Estase a colocar o chan no andar superior, ao que volverá a biblioteca, e habilitaranse postos de investigación e unha zona de lectura máis ampla. O andar inferior contará cunha estancia diáfana con acceso as dúas fachadas do edificio, entre outros servizos.