Estas son as trece marabillas arquitectónicas da provincia coruñesa

O Castelo de Vimianzo, as Torres de Altamira, o mosteiro de San Xoan de Caaveiro, as Torres do Allo, os Batáns de Mosquetín, o Pazo do Mariñán, o Teatro Colón, o Ecomuseo Forno do Forte, o Centro de interpretación da natureza, o Centro Etnográfico de Teixeiro e os dolmens de Axeitos, Cabaleiros e Dombate. Son as trece marabillas incluídas na guía de viaxe que vén de editar a Deputación da Coruña para promocionar a riqueza arquitectónica da provincia.

A publicación, presentada onte no Castelo de Vimianzo, compila fotografías, infografías, historia, tradicións e curiosidades coas que, ademais de dar a coñecer as «marabillas» da provincia, búscase salientar a necesidade de protexer o patrimonio.

Na presentación participaron o deputado provincial Xosé Penas, a alcaldesa de Vimianzo Mónica Rodríguez e a coordinadora do proxecto, Maite Vence.

Máis ca unha guía de viaxe

«Non falamos dunha guía de viaxe ao uso, pois esta publicación fala de tradicións, de historia, de lendas, de formas de vivir o territorio, de cultura...,sen perder de vista a importancia que o patrimonio ten para o turismo», explicou o deputado provincial.

Pola súa banda, a rexedora de Vimianzo quixo agradecer que a Deputación “escollera este marabilloso espazo para facer a presentación dun acto tan relevante. O noso Castelo é o faro que nos ilumina, testemuña da nosa historia e símbolo da nosa identidade”, así como unha parte “fundamental do patrimonio da nosa provincia”.