Ames prepara a estrea dunha curta que imaxina como será a vida en 2074

O auditorio da Casa da Cultura de Bertamiráns acollerá o vindeiro sábado 30 de novembro a estrea oficial de Raíces. Da utopía en diante, unha curtametraxe de ciencia ficción elaborada por varias cooperativas e protagonizada por mulleres rurais da parroquia amesá de Biduído da que este xoves foi revelado o seu tráiler.

O filme ambiéntase nun Ames utópico do ano 2074, onde a emerxencia climática xa foi superada e no que xorden novos modos de vida. O obxectivo dos seus creadores -explicaron hoxe na presentación que tivo lugar na Casa do Concello- é «amosar un futuro posible e desexable», a partir da narración da vida cotiá de varias mulleres. Medio ambiente, xénero, rural e sentimento de comunidade son algún dos elementos fundamentais desta historia.

A entrada para o pase de estrea será de balde ata completar o aforo e, despois desta presentación, comezará a andaina da curta por festivais de cine e a súa proxección noutros espazos comunitarios.

Ames afiánzase como escaparate do talento do sector audiovisual galego

Raíces. Da utopía en diante é froito do traballo colaborativo entre Feitoría Verde e Illa Bufarda, as entidades promotoras xunto ao grupo Chévere de teatro, e contou co financiamento da Fundación Daniel e Nina Carasso e do Concello de Ames.

Responsables da produción deste filme destacaron a importancia de que se trata dunha historia contada e protagonizada por mulleres, que na súa confección estivo sempre presente unha perspectiva interxeracional que sumou as aportacións de persoas de diferentes idades acerca das causas e posibles consecuencias do cambio climático.