O CIS de Lalín estreará o luns os servizos de Cardioloxía e Pneumoloxía

As áreas de Cardioloxía e Pneumoloxía do novo Centro Integrado de Saúde (CIS) de Lalín estarán operativas a partir do vindeiro luns, segundo confirmou onte o conselleiro de Sanidade, Antonio Gómez Caamaño, na súa visita ás instalacións mes e medio da súa posta en funcionamento.

Neste tempo, o edificio sanitario lalinense ten prestado máis de 35.000 asistencias, das cales 2.000 se corresponden co servizo de Pediatría e unhas 1.200 con actuacións de urxencia no punto de atención continuada (PAC). Este novo centro integra nun mesmo espazo atención primaria, urxencias e servizos hospitalarios; cunha carteira de servizos que inclúe áreas especializadas coma oftalmoloxía, psiquiatría, radiodiagnóstico ou traumatoloxía.

Lalín estrea un novo centro de saúde que evitará desprazamentos a Santiago

A Xunta de Galicia investiu máis de 13,5 millóns de euros na posta en servizo do CIS, coa colaboración do propio Concello de Lalín, que adaptou o terreo e os accesos ao mesmo. Así mesmo, a Fundación Andrea tamén participou na humanización da área de Pediatría, unha labor que onte foi agradecida polo conselleiro.

Durante a visita, Camaño valorou a implicación dos profesionais de atención primaria por ter levado a cabo un traslado ás novas dependencias «exemplar e sen incidencias»; á vez que trasladou que monitorizan a situación do centro para solucionar posibles incidencias de remate da obra e para analizar as propostas que cheguen para optimizar o seu funcionamento.