Dous colexios de Área serán sedes dun museo virtual de arte contemporánea

O CEIP Mesón do Vento, situado no concello de Ordes, e o CPI de Ponte Carreira, en Frades, son dous dos oito centros educativos seleccionados para formar parte dunha nova edición, a cuarta, do programa elaborado polo centro de arte da Fundación María José Jove para promover o acceso á cultura dende espazos rurais e fomentar tamén o sentido de pertenza ao territorio nestes lugares.

No colexio ordense hai na actualidade matriculados un total de 153 alumnos, divididos en catro aulas de Educación Infantil e seis de Educación Primaria, que serán durante un mes a sede dun museo virtual de arte contemporánea no que os estudantes poderán contemplar, a través dos medios tecnolóxicos aportados pola fundación, as obras da colección da entidade promotora.

El colegio de Mesón do Vento, líder estatal en competencias digitales

O mesmo poderán facer os estudantes no CPI de Ponte Carreira, onde neste curso hai matriculados 137 cativos que, segundo destaca a fundación, participan de «múltiples xornadas de convivencia e contacto coa contorna». Ao igual que en todos os centros escollidos para participar no mencionado proxecto, neste colexio de Frades levaranse a cabo experiencias educativas para fomentar o interese e a motivación da rapazada en seguir aprendendo.

O artista plástico Misha Bies Golas será o encargado de desenvolver parte destas propostas xunto á área de Educación e Mediación da Fundación María José Jove.

Con esta iniciativa, a fundación procura eliminar os obstáculos de acceso para gozar de creacións artísticas que poden existir nas contornas rurais galegas, a través dun programa que abriu a convocatoria no pasado mes de setembro e que finalmente terminou seleccionando oito centros educativos: tres na provincia da Coruña, dous na de Pontevedra, outro par en Ourense e un só na provincia de Lugo.

Xunto aos dous xa mencionados, participarán nesta edición a Escola de Vixoi, en Bergondo; o CEIP Antía Cal Vázquez, en Muras; o CEIP San Marcos de Cartelle, o CEIP do Bolo; a Escola de Pousada, en Vilaboa; e o CEIP Nosa Señora das Dores, no concello de Forcarei.

As escolas participantes estarán conectadas a través dun caderno de bitácora dixital no que se irán relatando as experiencias de cada centro e que servirá para, ao remate do programa, crear unha publicación final que dea conta dos seus resultados.

A Fundación María José Jove constituíuse no ano 2003 en memoria da persoa que lle dá nome para dar continuidade ao seu importante traballo en prol dos colectivos sociais máis desfavorecidos, con especial atención á infancia.