Veciños de Val do Dubra colocan unha pancarta xigante contra o vertedoiro de Niveiro

Veciños de Concello de Val do Dubra e doutros municipios da comarca de Santiago saíron esta fin de semana á rúa para amosar a súa disconformidade co proxecto para instalar un vertedoiro de residuos a ceo aberto no lugar de Niveiro.

Con motivo desta acción reivindicativa, colocaron unha pancarta xigante co lema “Vertedoiro Niveiro NON” no medio da vila de Bembibre, coa que queren simbolizar o seu rexeitamento ao proxecto de restauración do espazo da antiga canteira de Pedra Facha, na que unha compañía quere ubicar este depósito de residuos.

O rexeitamento a un vertedoiro en Niveiro enche a capital de Val do Dubra co apoio do Concello de Trazo

Segundo os participantes na protesta e os membros da Asociación Medioambiental de Niveiro e da Plataforma Niveiro Veciños, constituídas en contra do proxecto, esta proposta é “un sensentido que afectará gravemente tanto ao medioambiente como á saúde das persoas”. Por este motivo, advirten de que “non pararán as protestas ata ter certeza de que este proxecto está paralizado”. O Concello de Val do Dubra tamén apoia as reivindicacións dos veciños.