Encontros informativos coa veciñanza nas parroquias de Boqueixón

O alcalde de Boqueixón, Ovidio Rodeiro, e varios membros do seu equipo de goberno teñen pensado participar ao longo dos vindeiros meses en diversas reunións informativos coa veciñanza de varias parroquias do concello. Trátase dunha serie de conversas abertas coa cidadanía que xorden despois do «éxito» que fontes municipais din que tiveron as xa organizadas en lugares coma Lamas, Loureda, Sergude ou Vigo por mor da organización dos traballos de concentración parcelaria, que acabaron sendo aproveitadas para abordar máis asuntos.

Así pois, este luns ás 20.30 horas, terá lugar a primeira desta nova quenda cos residentes en Gastrar; para despois achegarse, nesta orde, ata A Granxa, Ledesma, Boqueixón, Lestedo, Oural, Pousada, Codeso, Donas e Sucira. Estas reunións informativas prolongaranse ata finais do próximo mes de febreiro.

Boqueixón prepara a concentración parcelaria de catro parroquias

Todos os encontros son de participación totalmente libre e non se require de inscrición previa. A intención do alcalde e do resto do seu goberno é facer unha exposición sobre a actualidade a nivel municipal e incorporar diferentes temas de interese, coma o plan xeral de urbanismo, as obras de saneamento dalgúns lugares, a nova campaña de compostaxe, as concentracións parcelarias, obras en execución, a numeración dixital dos inmboles ou presentar un novo proxecto de luminarias.