O Asalto ao Castelo de Vimianzo opta ao premio de Mellor Festa peninsular

Por primeira vez, o Asalto ao Castelo de Vimianzo opta a un recoñecemento internacional como Mellor Festa nos Iberian Festival Awards, uns premios anuais que recoñecen aos mellores festivais de música en Portugal e España e que promove a Asociación Portuguesa de Festivais de Música en colaboración coa Asociación de Festivales de España.

O obxectivo principal é recoñecer a excelencia e a innovación na industria dos festivais de música ibéricos, premiando os mellores en diversas categorías.

Está aberto un período de votacións na plataforma online talkfest.eu/2025-nominees, na que se pode encontrar o Asalto na categoría Best Festivity, ao lado doutras propostas da península.

Pode votarse unha vez por día, ata o dezasete de xaneiro. O resultado final darase a coñecer o quince de marzo nunha gala de premios que terá lugar en Almancil (Loulé), en Portugal.

Na última edición foron recoñecidos festivais como o Bilbao BBK Live, o Meo Kalorama ou os galegos SonRías Baixas, O Son do Camiño ou Ribeira Sacra.

O Asalto ao Castelo de Vimianzo está nominado como a Mellor Festa tras a súa longa traxectoria (celebrou este ano a súa edición número 27), e nun ano de gran éxito no que se conseguiu reunir a máis de tres mil persoas no concerto de Manu Chao.