Carballo ‘revoluciona’ o Nadal cun parque Playmobil Medieval e unha área infantil con maquinaria 'de obra'

O Nadal entrou este sábado nunha nova dimensión en Carballo. O programa Nadal Rebuldeiro ofrece aos nenos e nenas un espectacular parque de ocio no que a estrela é a área Playmobil Medieval (a partir de 4 anos), un espazo no que os cativos gozan dun universo de aventuras cos xogos de Playmobil de temática medieval, con oito mesas tematizadas, xoguetes das series City, Dino Rise, Regreso ao futuro ou Novelmore.

O Playmobil Júnior (para menores de 4 anos) ten 4 mesas tematizadas. Non menos solicitado está o recinto Rolly Toys, un universo de construción cheo de materiais e maquinaria de obra: bloques xigantes, camións de bombeiros, tractores, pas, carretas, remolques... Asimesmo, hai tres campos de golf infantil; un circuíto con oito vehículos de radio control; e dous espazos de xogo con gafas de realidade virtual (para maiores de oito anos).

O acceso a este parque de xogos, situado nunha carpa instalada na praza consistorial, é de balde. Inaugurouse este sábado e estará aberto os días 15 e 21 deste mes, de 11.00 a 14.00 e de 16.00 a 20.00 horas, e de do 16 ao 20, de 16.00 a 20.00. A estancia na carpa poderá limitarse en función da demanda.

Outra das novidades deste ano é a xincana de elfos que se celebrará o luns 23 de decembro, a partir das 18.00 horas, na citada carpa. A concellería de Mobilidade convida a todos os nenos e nenas, e tamén á mocidade, a participar nunha proba de obstáculos moi divertida na que haberá agasallos para todos os participantes.

Este Nadal o Concello de Carballo convida tamén aos máis pequenos a poñerse ao volante dun vehículo Infento (unha innovadora empresa que se especializa na creación de kits de construción de vehículos a tamaño natural).

O seu enfoque único permite aos nenos e nenas deseñar e montar os seus propios vehículos, fomentando a creatividade, a resolución de problemas e a aprendizaxe práctica. Cunha variedade de modelos e niveis de dificultade, Infento non só ofrece diversión; tamén promove habilidades STEM (ciencia, tecnoloxía, enxeñaría e matemáticas). Os obradoiros celebraranse os días 30 de decembro e 2 e 3 de xaneiro na carpa da praza consistorial. De 16.00 a 20.00 horas, os participantes montarán un vehículo de xeito cooperativo e, ao remate da actividade, poderán conducilo. Non hai límite de idade, pero si de prazas.