O magnetismo das regueifas atrae aos cativos de Carballo

O Concello de Carballo eleva a súa aposta por estender o poder magnético da regueifa entre os escolares do municipio. Faino, desta volta, a través dos obradoiros de improvisación oral da oitava edición do proxecto Enreguéifate, impulsado polos servizos de normalización lingüística de Carballo, Ames, Pontevedra, Santiago de Compostela e Teo.

Durante o mes de novembro participaron nesta iniciativa os CEIP de Nétoma-Razo, A Cristina e Bergantiños e os institutos Isidro Parga Pondal e Monte Neme, aos que se sumarán outros nunha segunda rolda de accións formativas no mes de xaneiro.

Da man de Lupe Blanco e Josinho da Teixeira, os obradoiros procuran poñer en valor a regueifa, incentivar a súa práctica e difundila entre a infancia e a mocidade. A formación para escolares é unha das accións principais do proxecto Enreguéifate, que tamén celebrou xa en Carballo un obradoiro para docentes o pasado mes de outubro.

Estas accións van destinadas tamén a promover a participación do alumnado e do profesorado no certame de regueifas en vídeo. O prazo de participación no Enreguéifate estará aberto do 20 de xaneiro ao 20 de marzo de 2025 e a inscrición poderá facerse dende a web do certame.

Como novidade, amplíanse de seis a oito os premios por cada categoría; ademais dos galardóns á regueifa máis brava, máis aguda, máis diversa, máis reivindicativa, mellor cantada e mellor falada, tamén haberá galardóns para a máis inclusiva e a para a máis entroideira.