Os poemas do baiés Labarta Pose ilustran o calendario de Zas

O Concello de Zas dedicou o calendario municipal de 2025 ao escritor e xornalista baiés Enrique Labarta Pose. «Quixemos que fose o protagonista porque o 13 maio cúmprese o centenario da súa morte», afirma o alcalde, Manuel Muíño.

O departamento de Cultura deseñou un almanaque de 13 follas adicado ao polifacético escritor co fin de continuar coa posta en valor da súa figura. En cada un dos meses poden lerse estrofas de diferentes poemas cuxa temática está relacionada cunha efeméride. Así, en marzo —coincidindo co Día da Muller — recóllense algunhas das estrofas do poema Defensa das Mulleres no que Labarta defende a igualdade. En novembro, mes do 25N, poden lerse outras estrofas deste mesmo poema no que denuncia, xa na súa época, a violencia contra as mulleres.

'O Poeta da Terra', primeiro libro infantil adicado a Enrique Labarta Pose

Eventos como O Carme do Briño, en Borneiro, a Festa da Patroa de Tabeirón, en Baio, ou a feira de Verdillo, en Carballo, tamén teñen o seu protagonismo xa que foron eventos aos que lles dedicou algún poema.

A ‘Antoloxía Poética’ de Labarta Pose chega ao Museo do Pobo Galego

Maio é un mes especial, xa que coincide coa data do seu pasamento, pouco antes do Día das Letras Galegas. Escolleron neste caso estrofas do poema titulado Que me enterren aló, no que Labarta pide que o enterren en Baio, un desexo que non se puido cumprir pese aos esforzos do Concello de Zas.