Gran éxito de público do espectáculo de maxia de Cayetano Lledó en Vedra

O salón de actos do centro sociocultural de Vedra quedou pequeno para atender a alta expectación espertada pola actuación do mago Cayetano Lledó programada como parte das actividades do Concello para celebrar estas datas festivas no municipio.

O espectáculo de maxia de Nadal deste artista galego, premiado en multitude de certames e tamén produtor de teatro e ilusionista, encheu un auditorio cun gran número de cativos e familias interesados en desfrutar en primeira persoa dos seus trucos máis logrados.

Vedra recada fondos para afectados pola DINA entre música e postos de artesanía

Así mesmo, dende a Administración municipal aproveitaron a ocasión para facer o acto de entrega dos premios ás mellores tarxetas postais do Nadal elaboradas por nenos e nenas residentes en Vedra.

O alcalde, Carlos Martínez Carrillo, e a concelleira de Cultura, Diana Varela, fixeron entrega destes premios xunto co propio Cayetano Lledó. En primeira posición e, polo tanto, seleccionada coma felicitación oficial do Concello, quedou a tarxeta de Pablo Ayude Santas, participante na categoría de Secundaria.

Entre as persoas de idade preescolar, de menos de dous anos de idade, a gañadora foi Marta Vázquez Rodríguez. Na categoría infantil, de tres a cinco anos, o premio foi para Xenia Louzao Magariños. Entre os alumnos de primeiro e segundo de Primaria o vencedor foi Juan Carbia Fernández e, entre os de terceiro e cuarto; a tarxeta escollida foi a de Xela Parada Rodríguez. Por último, no último bloque de Primaria o premio foi para Marco Iglesias Álvarez.