Piden a revisión da protección acústica do tren ao paso por lugares de Teo

O pleno de Teo aprobou onte unha moción do grupo de goberno pola que se lle solicita ao Ministerio de Transportes que revise os cálculos feitos para dispor os materiais de illamento e propagación acústica nas vías de alta velocidade ferroviaria da ruta Padrón-Santiago que cruzan o municipio nos lugares de Francos e Osebe.

Veciños destas zonas trasladaron as súas queixas pola instalación dunhas pantallas opacas de tres e de cinco metros que, ademais de duplicar nalgún caso a altura das existentes, supoñen «unha importante perda da calidade» de iluminación e da amplitude visual.

Por este motivo, o Concello insta ao Ministerio a dar con outra solución que cumpra a legalidade e afecte en menor medida aos veciños. No caso de non ser esta posible, engade a proposta respaldada pola corporación, demandan que as pantallas que se coloquen sexan translúcidas para que o seu impacto sexa menor.

Adif expropiará medio centenar de fincas en Santiago para colocar pantallas contra el ruido del tren

Este foi un dos puntos tratados nun pleno no que tamén se aprobou a adhesión de Teo á asociación de concellos afectados pola autoestrada AP-9, que permitirá unha maior recadación polo IBI desta infraestrutura.

Así mesmo, acordouse destinar a maioría dos fondos do plan provincial de cooperación ás obras e servizos de competencia municipal á ampliación do servizo de axuda no fogar e unha menor parte a adquirir novo equipamento para realizar programas sociais.