Padrón rememora a Traslatio con rogos á equidade e fraternidade

O Concello de Padrón rememorou o traslado dos restos do Apóstolo Santiago dende a cidade hebrea de Jaffa ata o antigo porto de Iria Flavia, a Traslatio, cunha cerimonia marcada por un forte espírito de fraternidade e equidade.

O alcalde padronés, Anxo Arca, foi o encargado de realizar a ofrenda institucional ao Apóstolo, a quen se encomendou para pedir que "a intransixencia relixiosa e política non se impoña á liberdade" e que, "por riba das ideoloxías e os intereses particulares, os gobernantes saiban dialogar e chegar a acordos para aumentar o benestar da cidadanía".

Lembranza ás vítimas da DINA

De igual xeito, o rexedor tamén aproveitou para facer unha lembranza das vítimas da DINA que afectou ao levante peninsular e animou a "non deixar decaer" o espírito solidario que se avivou nas xornadas posteriores a esta catástrofe. Neste sentido, tamén fixo alusión a outras cuestións de carácter social, pedindo a fin da violencia machista e fórmulas que axuden a "dignificar aos colectivos máis desfavorecidos" para que todas as persoas poidan contar "coas mesmas oportunidades, independentemente da súa orixe e condición".

Arca remarcou que esta Traslatio pon de manifesto o papel de Padrón coma "berce da tradición xacobea", un lugar que é "recoñecido e visitado cada ano por milleiros de peregrinos que reciben a hospitalidade" dos padroneses. Así pois, manifestou que esta cerimonia reafirma a relevancia histórica, cultural e espiritual deste enclave atravesado polo Camiño de Santiago.

A misa solemne foi oficiada polo membro da secretaría de Estado do Vaticano, Francisco Froján Madero; un acto litúrxico que contou coas voces da Coral Polifónica Padronesa e que se pechou cunha actuación musical do Cuarteto Novecento.