O comercio da Laracha sortea experiencias entre a clientela

O alcalde da Laracha, José Manuel López Varela, e a edil de Promoción Económica, Rocío López, entregaron os agasallos aos gañadores do sorteo realizado entre todas as tarxetas Rasca e gaña depositadas nas urnas habilitadas nas tres bibliotecas municipais no marco da campaña organizada baixo o lema Agasalla comercio local, ten premio.

Esmeralda Rodríguez Brandón gañou o premio consistente nunha experiencia cultural (unha estancia dunha noite en hotel en Madrid e dúas entradas para asistir ao espectáculo musical El rey león); María Pilar Fuentes Rey gañou a experiencia turística (unha estancia de dúas noites para dúas persoas con acceso a spa no Augusta Eco Wellness Resort de Sanxenxo); e Geli Pérez Lodeiro gañou a experiencia gastronómica (unha cea ou comida para dúas persoas).

 O Concello impulsou esta iniciativa co triplo obxectivo de sensibilizar á poboación sobre a importancia de facer as compras no comercio de proximidade, atraer e fidelizar á clientela e subvencionar as compras dos cidadáns. Para elo puxéronse a disposición dos establecementos adheridos 10.000 tarxetas Rasca e gaña para entregar aos clientes por cada compra de 10 €.

Mil desas tarxetas contiñan un premio directo de 10 € para consumir no comercio local e nos servizos de proximidade; 21 contiñan premios directos con agasallos cedidos polas empresas participantes; e coas preto de 9.000 restantes podíase participar no sorteo dos tres agasallos consistentes en experiencias.