Ames organiza para este ano 38 andainas circulares

O Concello de Ames retomou este xoves o programa SaúdeAndo, que inclúe 38 andainas circulares dende os centros de saúde do Milladoiro e Bertamiráns. Estas andainas, organizadas pola concellería de Promoción da Saúde, organízanse cada xoves de semanas alternas ao longo de todo o ano. Son rutas de dificultade media-baixa e contan cunha duración aproximada de entre unha hora e hora e media.

No Milladoiro celebraranse os días 23 de xaneiro, 6 e 20 de febreiro, 6 e 20 de marzo, 3 de abril, 15 de maio, 12 e 26 de, 4 e 18 de setembro, 2, 16 e 30 de outubro, 13 e 27 de novemebro e 11 de decembro.

En Bertamiráns serán os días 16 e 30 de xaneiro, 13 e 27 de febreiro, 13 e 27 de marzo, 10 e 24 de abril, 8 e 22 de maio, 5 e 19 de xuño, 11 e 25 de setembro, 9 e 23 de outubro, 6 e 20 de novembro e 4 e 18 de decembro. As saídas serán sempre ás 17.30 horas dende os centros de saúde de ambas as localidades.

Estas saídas contan sempre coa presenza dun monitor de marcha nórdica, pensando nas persoas que desexen practicar esta modalidade. «Estas andainas son unha forma fácil e entretida de poñernos de novo en forma despois dos excesos do Nadal», sinalou a concelleira de Deportes, Susana Señorís, que anima aos veciños a participar.