Peluquería Carlos gaña o concurso de escaparates de Nadal de Melide

Peluquería Carlos Gómez é a gañadora do concurso de escaparates de Nadal do Concello de Melide, polo que lle corresponde un premio de 1.000 €.

O xurado outorgou o segundo e o terceiro premio a Carnicería Cardelle (500 €) e a Intres Fotografía (250 €), respectivamente. Na súa decisión tivo en conta a orixinalidade, a montaxe, a estética, a creatividade e a ambientación de Nadal dos 25 escaparates a concurso, seis máis que ano pasado.

O concurso é unha das iniciativas do Concello que promoven a creación dun ambiente único de Nadal no municipio durante as datas festivas.

O concelleiro de Comercio, Xosé Igrexas, valora moi positivamente a edición deste ano, «tanto polo nivel da decoración como polo incremento no número de establecementos participantes».