Laxe pon en valor o patrimonio natural e cultural do litoral

O conselleiro do Mar, Alfonso Villares, visitou os paneis informativos instalados nos miradoiros de Cabo de Area, faro, cemiterio e capela de Santa Rosa, no concello de Laxe, os cales foron financiados pola Xunta a través do Grupo de Acción Local do Sector Pesqueiro Costa da Morte.

Villares puxo en valor «o impacto positivo deste tipo de actuacións na valorización do patrimonio natural, paisaxístico e cultural do litoral galego». Acompañado polo alcalde, Francisco Charlín, e pola directora xeral de Desenvolvemento Pesqueiro, Marta Villaverde, sinalou que estas accións permiten afondar no coñecemento e posta en valor da contorna pesqueira, e axudan a divulgar a necesidade de salvagardar o entorno e as actividades que se desenvolven «como garantía para un futuro sostible, tanto entre a propia veciñanza como entre os visitantes que recalan no municipio».

A Consellería do Mar vén de desenvolver diferentes investimentos en Laxe, como a mellora dos equipamentos da fábrica de xeo da lonxa (84.000 €). A confraría tamén foi beneficiaria da liña de axudas para proxectos colectivos con case 41.000 euros. Ademais, na dragaxe do porto investiu 3,6 millóns de euros.