Rescatan a dúas persoas maiores tras envorcar o seu vehículo en Dodro
O accidente produciuse esta tarde no lugar de Imo, na parroquia de San Xoán de Laíño
Coche envorcado nunha das marxes dunha estrada secundaria en Dodro / Bombeiros de Boiro
Añádenos en Google
Os bombeiros de Boiro tiveron que rescatar este sábado a dúas persoas de avanzada idade atrapadas no interior do vehículo co que circulaban por unha estrada secundaria á altura do lugar de Imo, na parroquia de San Xoán de Laíño, no concello de Dodro (A Coruña).
A intervención dos técnicos de emerxencias tivo lugar despois de que o servizo do 112 Galicia tivera constancia dunha alerta por esta saída de vía rexistrada ás 15:50 horas, o que motivou o desprazamento dos efectivos do parque de Boiro, xunto con axentes da Garda Civil de Tráfico e membros do Grupo de Emerxencias Supramunicipal (GES) de Padrón.
Tamén se trasladou un aviso ao servizo de Urxencias Sanitarias de Galicia-061, aínda que a súa asistencia no lugar do accidente non foi precisa, posto que as persoas afectadas polo sinistro resultaron ilesas e non presentaban secuelas de ningún tipo.
Porén, si foi precisa a actuación dos bombeiros para axudarlles a saír do vehículo, envorcado lateralmente nunha das marxes da estrada, dado que se trataba de persoas maiores con dificultades de mobilidade nese contexto.
