Impulsan accións de control da flora e fauna do Ulla na área do Xirimbao

A conselleira de Medio Ambiente e Cambio Climático, Ángeles Vázquez, visitou onte a área recreativa do Xirimbao, no Concello de Teo, un espazo no que o goberno galego levo investido preto de medio millón de euros dende o ano 2022 en diferentes accións de mellora que inclúen actuacións de control da flora e fauna invasoras deste ecosistema fluvial na contorna do río Ulla.

Así pois, gran parte dos fondos dispostos foron dedicados a este tipo de labores, nos que se contaron traballos de eliminación de especies exóticas invasoras e a mellora da vexetación de ribeira, coidando dalgunhas das árbores senlleiras do parque, que inclúe dúas secuoias vermellas de grande antigüidade; ademais de traballos de reparación e mantemento do edificio do refuxio de pescadores do couto de Couso.

El puente colgante más largo de Galicia, a tan solo veinte minutos de Santiago

Actualmente, o Executivo autonómico ten en marcha unha obra para artellar unha estación de control da fauna piscícola cun contador automático de exemplares, unha intervención que ten un orzamento asignado superior aos 166.000 euros.

De igual xeito, a conselleira trasladou que a Xunta prevé actuar sobre a icónica pasarela colgante do Xirimbao, cuxo estado puido comprobar de primeira man, así coma as intervencións previas á mellora integral desta infraestrutura, á que se dedicarán uns 111.650 euros.